| Explanations in Malagasy |
3 faharoa amin' ny filaharan' ny volana malagasy. Ny anarany dia nalaina avy tamin' ny anaran' ny antokon' ny kintana, izay ataon' ny Arabo hoe Eth-thoür (Taureau). Zana-bintana eo atsimon' ny Alahamady ny Adaoro. Eo no toerana ao an-trano fametrahana ny fandriana.
Ny tonon' andro Adaoro dia atao hoe "andro mena" na "andron' afo"; ka ninoana ho fi-may na halam-baratra, ny trano aorina amin' ny tonon' andro Adaoro. Ny masoandro dia natao ho Adaoro, satria mandoro ny zavatra rehetra izy.
Ny trano vao vita, na dia tsy natomboka tamin' ny tonon' andro Adaoro aza, dia tsy maintsy nandalo izany tonon' andro izany ihany teo am-panaovana; ka alohan' ny hidirana voalohany ao dia andrehetana afo miroborobo ao anatiny, sady misy miantsoantso hoe: "May ny trano! May ny trano!" Dia afak' izay, hono, ny herin' ny afo. Ho fanampin' izany anefa dia fadirana tain-kodinato sy vonin-tsongotsongo koa ny trano vao vita, ary isoronana akoholahy mena. Samy mena ireo, ka mandresy ny afo.
Ny zaza teraka amin' ny vava-Adaoro dia atahorana ny afo, ka tsy maintsy alana vintana. Toy izao no fanao amin' ny toy izany: misy rano tomboka kely atao amin'ny mololo, na horona, dia entin' ny reniny miditra amin' io trano tomboka io ilay zazakely. Rehefa tafiditra ao izy mianaka dia tsoloana afo amin' izay ilay trano tomboka, ary mitsoaka mamandositra faingana ravehivavy mitondra ny zazakely; dia vitan' ny afo, hono, ilay zaza! Ho fanampin' izany dia ampiambozonina vakana tsileondoza (vakana mena mivolon' afo) koa ilay zazakely ho fanefitry ny afo, hono!
Ny zaza teraka amin' ny vodi-Adaoro dia heverina ho tsara vintana. Raha zazalahy izy dia hahay mikabary; ary raha zazavavy dia ho tsara fanahy.
Ny vintana Alakarabo no mifandratra amin' ny Adaoro; ary ny mihataka eo amin' ny Adimizana no iarenany. [1.10]
4 [3.1]
5 Anaran' ny volana faharoa amin' ny filaharan' ny volana malagasy merina, manarakaraka ny Alahamady ary alohan' ny Adizaoza, ka ny toerana nomen' ny Ntaolo azy tao an-trano dia eo amin' ny lafin-drindrina atsinanana, ilany avaratra, ka eo no fametrahana ny fandriana. Ny tononandro Adaoro dia atao hoe andro mena na andron' afo ka natahorana amin' ny afo ary halam-baratra ny trano aorina amin' ny Adaoro
6 Fanandroana: Ny zaza teraka vava adaoro dia atahorana afo ka alana vintana; ny teraka vody adaoro, tsara fa hidaoro (hidoboka) tsara: mahay mitondra ny tenany, mahay miteny; raha lehilahy dia mpikabary; raha vehivavy, mahay mitondra tena [1.1]
|
